15 դեկտեմբերի, 2009թ.: Հայաստանի ողջ տարածքում նշանավոր հուշարձանների հարևանությամբ շուտով կտեղադրվեն բրայլյան այբուբենով պատրաստված բազմալեզու տեղեկատվական վահանակներ: Ուրբաթ օրը` դեկտեմբերի 11-ին, Արմավիրի մարզում, Զվարթնոց տաճարի տարածքում, տեղի ունեցավ առաջին վահանակների շնորհանդեսը: Միջոցառումը կազմակերպել էին «Հայկական հուշարձանների ճանաչման ծրագիր» (ԱՄԱՓ) հասարակական կազմակերպությունը, Հուշարձանների և տեսարժան վայրերի միջազգային խորհրդի հայաստանյան ներկայացուցչությունը (ԻԿՕՄՕՍ-Հայաստան) և ՀՀ մշակույթի նախարարությունը ԱՄՆ միջազգային զարգացման գործակալության «Մրցունակ մասնավոր հատված Հայաստանում» (CAPS) ծրագրի, ՎիվաՍել-ՄՏՍ-ի և Գյումրիում Իտալիայի պատվավոր հյուպատոսի ֆինանսական աջակցությամբ:

Միջոցառման մասնակիցներին ելույթներով ողջունեցին Հայաստանում ԱՄՆ դեսպան Մարի Յովանովիչը, ԱՄԱՓ-ի համահիմնադիր Ջոն Հյուզը, ծրագրի տնօրեն Ռիկ Նայը և Հայաստանում Իտալիայի դեսպան Բրունո Սկապինին, ովքեր կարևորեցին ծրագրի դերը Հայաստանի հուշարձաններ այցելող տեսողական խանգարումներ ունեցող և կույր մարդկանց իրենց իսկ այբուբենով հուշարձանների մասին կարդալու հնարավորություն ընձեռելու առումով:

Տեղեկատվական վահանակները պատրաստված են բրայլյան գրատիպով (կույրերի համար նախատեսված ուռուցիկ 6 կետերի համակցությամբ տառերի իմաստային բովանդակությամբ համակարգ) տպագրական հատուկ սարքի օգնությամբ Իտալիայում: Բրայլյան գրատիպով վահանակների տեղեկատվությունը վերցվել է 2008թ. Զվարթնոցում ԱՄԱՓ-ի կողմից տեղակայված ստանդարտ տեղեկատվական վահանակների բովանդակությունն ամփոփ ներկայացնող տեքստերից: Հինգ լեզուներով` արևելահայերեն, անգլերեն, ռուսերեն, իտալերեն և ֆրանսերեն գրված վահանակները ծանոթացնում են այցելուներին տվյալ վայրին և հնարավորություն են տալիս կիրառել ԱՄԱՓ-ի կողմից ապագայում ծրագրված «Աուդիո տուր» ծրագիրը, որը տեսողության խանգարումներ ունեցող և կույր այցելուներին կընձեռի տվյալ վայրում ինքնուրույն զբոսապտույտ կատարելու հնարավորություն: 

Միջոցառումը բաղկացած էր բրայլյան վահանակների շնորհանդեսից, Հայաստանի կույրերի երաժշտական անսամբլի և Հայաստանի կույրերի երգչախմբի կատարումներից: Միջոցառմանը մասնակցում էր նաև Հայաստանի կույրերի միավորումը, ներկա էին կույրերի դպրոցի սաները, ովքեր հանդիսավոր կերպով բացեցին նոր վահանակները: Բացման արարողությանը հաջորդեց բացառիկ զբոսապտույտ Զվարթնոց համալիրում:

2008թ. ԱՄԱՓ ծրագրի մեկնարկից մինչ օրս ծրագիրն իրականացնողների ջանքերով շուրջ 330 տեղեկատվական վահանակներ և ճանապարհային ուղենշաններ են տեղադրվել երկրի 21 հուշահամալիրներում և մոտ 45 զբոսաշրջավայրերում: Ծրագրի նպատակն է բարելավել հայատանյան զբոսաշրջավայրեր այցելող զբոսաշրջիկների ժամանցը` ապահովելով պատշաճ ճանապարհային նշաններ, բազմալեզու տեղեկատվական վահանակներ, տպագիր տեղեկատվական նյութեր, ինչպես նաև տվյալ զբոսաշրջավայրը բնորոշող հուշանվերներ:

Զվարթնոցի տաճարից բացի, ԱՄԱՓ ծրագրի շրջանակներում բրայլյան վահանակներ կտեղադրվեն նաև Տաթևում, Գեղարդում, Գառնիում, Հաղպատում, Խոր Վիրապ-Արտաշատում, Նորավանքի վանական համալիր-Նորավանքի կիրճում, Քարահունջում, պատմական Գյումրիում, Ամբերդում, Սևանավանքում, Արենիում, Գոշավանքում և Նորատուսում:

Դեկտեմբերի 4-ն և 5-ին <<Մրցունակ մասնավոր հատված Հայաստանում>> (CAPS) ծրագրի կողմից իրականացվեց դասընթաց Դեղագործական արտադրանքների պատշաճ բաշխման գործունեության ԵՄ ուղեցույցները թեմայով:  Վերջերս հիմնադրված Ջի Էքս Պի գերազանցության կենտրոնի հետ համատեղ կազմակերպված դասընթացը վարում էր միջազգային փորձագետ Դկտ. Մայքըլ Քիմբերը: Դասընթացին մասնակցում էր Հայաստանի դեղարտադրողների և դիստրիբյուտոր ընկերությունների, Դեղերի և բժշկական տեխնոլոգիաների փորձագիտական կենտրոնի, ՀՀ առողջապահության նախարարության և Առողջապահության ազգային ինստիտուտի 22 ներկայացուցիչ: Դասընթացի նպատակն էր զարգացնել առանձին ընկերությունների բաշխման և մատակարարման ցանցում որակի ապահովման համակարգի կազմակերպման կարողությունները, ինչը թույլ կտա ապահովել հիվանդներին որակյալ դեղերով` ըստ ԵՄ ՊԲԳ պահանջների:

Դեկտեմբերի 9-11-ը Մայքըլ Քիմբերի կողմից իրականացվեց ՊԱԳ աշխատավայրի գնահատման թեմայով դասընթաց, որում ընդգրկվեցին 2009թ. մայիս-հունիս ամիսներին տեղի ունեցած ՊԱԳ դասընթացի 12 մասնակիցները: Վերջինիս նպատակն էր ստեղծել գնահատողների խումբ, որը կկարողանա գնահատել ընկերություններում իրականացվող ՊԱԳ վերապատրաստման դասընթացները և դասընթացավարներին: ՊԱԳ դասընթացավարները մշակելու են աշխատավայրում վերապատրաստման իրենց սեփական ծրագրերը և գնահատման փաստաթղթերը ստանդարտացված չափորոշիչների հիման վրա:

Ահա թե ինչ են նշում մասնակիցները. <<Մենք կարողացանք ճիշտ պատկերացում կազմել այն մասին, թե ինչպես են կատարվում աշխատավայրի գնահատումները>>, <<Ես մանրամասն տեղեկացա գնահատման կարևորության և մեթոդների մասին>>, <<Սա դեղագործական արտադրանքների պահպանման և բաշխման գործընթացների ճիշտ կազմակերպման, ինչպես նաև արտակարգ իրավիճակներում ճիշտ որոշումների կայացման մասին գիտելիքների բարելավման մեծ հնարավորություն էր մեզ համար>>:

Երկու դասընթացներն էլ կազմակերպվել են նորաստեղծ Ջի Էքս Պի գերազանցության կենտրոնի (ԳԿ) հետ համագործակցությամբ, որը, մասնավորապես զբաղվում էր դասընթացների խթանման, մասնակիցների հավաքագրման և ընտրության հարցերով: Դասընթացները նպաստեցին դեղերի որակի ապահովման մասին գիտելիքների բարելավմանը և ընդլայնեցին CAPS ծրագրի աջակցությամբ հիմնադրված Ջի Էքս Պի գերազանցության կենտրոնի կարողությունները: