Վերջին ժամանակաշրջանի պատմության մեջ առաջին անգամ Թուրքիայի, Հայաստանի, Ադրբեջանի և Վրաստանի զբոսաշրջության ոլորտների ներկայացուցիչները հավաքվեցին մեկ հարկի տակ Թուրքիայի Ստամբուլ քաղաքում դեկտեմբերի 13-14-ը կազմակերպված սեմինարի և B2B (բիզնեսը բիզնեսին) միջոցառման շրջանակներում տարածաշրջանային համագործակցության խնդիրը քննարկելու նպատակով:

Միջոցառման հիմնական նպատակն էր բացահայտել տարածաշրջանային երթուղիների մշակման և չորս երկրների զբոսաշրջության ոլորտների միջև համագործակցության երկարաժամկետ ներուժը, ինչպես նաև հատկորոշել կողմերի հետաքրքրվածությունը տարածաշրջանային բրենդի (որպես մեկ տարածաշրջանային զբոսաշրջային ուղղություն) ստեղծման և այն աշխարհին ներկայացնելու հեռանկարով:

Այս երկօրյա միջոցառումը կազմակերպել  էր ԱՄՆՄԶԳ-ի կողմից ֆինանսավորվող և Կրթության զարգացման Ակադեմիայի (AED) Հայաստանյան գրասենյակի կողմից իրականացվող Մարդկային և ինստիտուցիոնալ կարողությունների զարգացում (HICD) ծրագիրը: Վերջիններս նաև աջակցեցին Հայաստանի զբոսաշրջության ոլորտի ներկայացուցիչներին միջոցառմանը մասնակցելու հարցում: Բացի այդ, իր աջակցությունը տրամադրեց նաև գերմանական GTZ ծրագիրը (ապահովելով վրացի և ադրբեջանցի մասնակիցների ներկայությունը) և TURSAB կազմակերպությունը (քաջալերելով թուրք ներկայացուցիչների մասնակցությունը): Հայկական կողմից մասնակցում էին 8 տուրօպերատորներ, ԶԶՀԳ-ն (Զբոսաշրջության զարգացման հայկական գործակալություն), AED-ն և  CAPS ծրագրը: Ներկա էին նաև տասը մասնակիցներ Վրաստանից, 10-ը` Ադրբեջանից և 40-ը` Թուրքիայից:

Միջոցառման առաջին օրվա սեմինարը հնարավորություն ընձեռեց Հայաստանին, Վրաստանին և Ադրբեջանին ներկայացնել իրենց երկրները միմյանց և, այնուհետև, Թուրիքայի հետ միասին քննարկել տարածաշրջանային ապրանքների մշակման հնարավորությունը, որում կընդգրկվեն բոլոր չորս երկրները:

Երկրորդ օրը մեկնարկեց B2B միջոցառումը Հայաստանի, Վրաստանի և Ադրբեջանի տուր օպերատորների մասնակցությամբ: Այնուհետև, Հայաստանը, Վրաստանը և Ադրբեջանն իրենց երկրները ներկայացրեցին թուրք տուր օպերատոներին և քննարկեցին բիզնես հնարավորությունները: