22.07.2010. CAPS ծրագիրը «Դիլիջան» ազգային պարկին (ԴԱՊ) աջակցություն է ցուցաբերել` ստեղծելով և հրատարակելով ուղեցույց, որը նպատակ ունի խթանել ռեգիոնալ զբոսաշրջության զարգացումը և բարձրացնել ԴԱՊ-ի մասին իրազեկվածությունը: Ուղեցույցը հրատարակված է անգլերեն լեզվով և պարունակում է տեղեկատվություն 11 արշավային երթուղիների մասին` ներառյալ երթուղիների քարտեզները, նկարագրությունը և այլ օգտակար տեղեկություններ: Ուղեցույցը նախատեսված է այն տեղացի և օտարերկրյա զբոսաշրջիկների համար, ովքեր սիրում են ակտիվ հանգիստ անցկացնել բնության գրկում և այցելել պատմամշակութային հուշարձաններ ու բնական տեսարժան վայրեր, որոնք թաքնված են անտառներում և հեռու են զբոսաշրջային տարածված երթուղիներից: Ուղեցույցը հատկապես հետաքրքիր կլինի բնության սիրահարների համար, քանի որ այստեղ ընդգրկված են բուսական և կենդանական աշխարհի այն ներկայացուցիչների անունները, որոնց կարելի է հանդիպել պարկում: Երթուղիների նկարագրություններում ընդգրկված է նաև օգտակար տեղեկատվություն դրանց բարձրության, ինչպես նաև բջջային հեռախոսացանցի հասանելիության մասին, ինչը կարևոր է ինքնուրույն ճանապարհորդող զբոսաշրջիկների համար: Ուղեցույցում նաև տեղ են գտել որոշ օգտակար արտահայտություններ հայերենով և արշավ գնալու կանոնները:

Բոլոր 11 ուղիներն իրենց բարդության մակարդակով խիստ տարբերվում են մեկը մյուսից: Որոշ ուղիներ տանում են զբոսաշրջիկներին դեպի վայրեր, որտեղ կարելի է հանգստանալ և նախաճաշել,  իսկ որոշ ուղիներ` դեպի լեռնային գյուղեր: Կան ուղիներ, որոնք անցնում են թավ անտառների միջով` հասնելով մինչև լեռնային լճեր և ջրվեժներ, կարմիր կենու յուրօրինակ բացատներ և անտառների մեջ թաքնված եկեղեցիներ: Որոշ ուղիներ անցնում են լեռնային դաշտերով և մարգագետիներով` տանելով զբոսաշրջիկներին դեպի լեռնային գագաթներ, որտեղից բացվում է հրաշալի տեսարան դեպի Ազգային պարկ և Սևանա լիճ:

Ուղեցույցը տպագրվել է հազար օրինակով և տրամադրվել է ԴԱՊ-ին: Այն նաև կտրամադրվի Դիլիջանի տեղեկատվական կենտրոնին զբոսաշրջիկներին բաժանելու նպատակով: Ուղեցույցի էլեկտրոնային տարբերակը հետագայում կտեղադրվի ԴԱՊ-ի ինտերնետային կայքում (www.dilijanpark.am), ինչը թույլ կտա ապագա այցելուներին արտաբեռնել այն նախքան Ազգային պարկ հասնելը: